Wasiir Fiqi oo baarlamaanka horgeeyay Sharciga dhismaha Ciidanka Galmudug

Wasaaradda Amniga Gudaha ee dawlad Goboleedka Galmudug ayaa maanta ku guulaysatay in barlamaanka maamulkaasi ay horgeyso hindise sharciyeedka dhismaha ciidamada Booliiska Galmudug.
Wasiirka Amniga Gudaha Axmed M. Fiqi oo samaynayey bandhigga aqriska koowaad ee hindise sharciyeedka ayaa sharaxaad faahfaahsan ka bixiyey baahida ay Galmudug u qabto sharcigan gaar ahaan wakhtigan la joogo oo ay wasaaraddu ku hawllan tahay dhismaha ciidamada amniga Galmudug oo ay ka mid yihiin Boolisku.
Wasiirka Amniga ayaa xusay asagoo tixraacaya dastuurka dawladda Galmudug In qodobkiisa 69aad uu ogolaanayo in “Dawladda Galmudug ay yeelato ciidamo nabadgalyo oo isugu jira: Booliis iyo Birmad, Nabadsugid iyo Ciidamada Asluubta”.
Sidoo kale wasiirka ayaa sheegay asagoo cuskanaya heshiis dhexmaray dawladda federaalka ah iyo dawladaha xubnaha ka ah Federaalka kana dhacay Baydhabo 24 Juun 2016 in lagu jaangooyey qaab-dhismeedka cusub oo ay yeelanayaan ciidamada Booliska Soomaaliyeed oo noqonaya laba heer oo kala ah heer federaal iyo heer dawlad goboleed, mid walbana uu yeelanayo sharci Booliis oo u gaar ah, kan heer federaal ahna laga ansixinayo barlamaanka federaalka, kan heer dawlad goboleedna laga ansixinayo barlamaanada dawlad goboleedyada”
Sharciga dhismaha ciidamada Booliska Galmudug ee maantay barlmaanka la horgeeyey ayaa ka kooban 14 cutub iyo 82 qodob oo dhammaan ka hadlaya waajibaadka, hawlaha iyo xuquuqda ciidamada Booliiska Galmudug iyo qodobo kale.
Wasiirka Amniga oo ay wehliyaan wasiiru dawladaha wasaaradda amniga iyo agaasimaha guud ayaa xildhibaanada barlamaanka ka codsaday in ay ansixiyaan inta lagu guda-jiro kalfadhiga 2aad ee barlamaanka.

LEAVE A REPLY

Please enter your comment!
Please enter your name here